Project Description

Wolfgang Amadeus Mozart fæddist árið 1756 í borg sem nú heitir Salzburg í Austurríki. Faðir Wolfgangs hét Leopold Mozart og var kórstjóri, tónskáld og reyndur kennari. Þegar stóra systir Wolfgangs, María Anna, var sjö ára byrjaði hún að læra á píanó hjá föður sínum meðan þriggja ára gamall Wolfgang horfði heillaður á.

Þegar Wolfgang var orðinn fjögurra ára byrjaði hann að læra á píanó hjá föður sínum. Hann lék strax af mikilli nákvæmni og innlifun og fimm ára gamall var hann farinn að semja lítil tónverk sem pabbi hans skrifaði niður fyrir hann. Árið eftir ferðuðust Wolfgang og María Anna – eða Nannerl eins og Wolfgang kallaði hana – um Evrópu með föður sínum og þau héldu tónleika fyrir kóngafólk. Á ferðalaginu lærði Wolfgang að spila á fiðlu og orgel.

Þegar Wolfgang var 8 ára gamall gaf hann út fyrstu sónöturnar sínar fyrir harpsikord og 13 ára gamall skrifaði hann sína fyrstu óperu.
Um 25 ára aldurinn var var þekktur sem einn færasti hljómborðsleikari Vínarborgar og var jafnframt dáð tónskáld. Meðal frægustu verka hans eru „Eine Kleine Nachtmusik“ (Lítið næturlag) og 12 tilbrigði við franska lagið „Ah vous dirais-je, Maman“ sem við þekkjum sem „Gulur, rauður, grænn og blár“ sem Mozart lærði þegar hann var barn.

Wolfgang Amadeus Mozart lést 5. desember árið 1791, aðeins 35 ára gamall. Hann skildi eftir sig meira en 600 tónverk, meðal annars sinfóníur, píanóverk og óperur. Sum þessara verka eru álitin bestu verk klassískrar tónlistar.

Tóndæmi

Eine kleine Nachtmusik.

Lacrimosa-kaflinn úr Sálumessu Mozart.

Sinfónía nr. 40

Forleikur að óperunni Brúðkaup Fígarós.